Барааны тайлбар:

Зохиолч Б.Баярхүүгийн "ТЭНГЭРИЙН 5 ЭЛЧ" туужийн хээгүй, хэнэггүй, хөгжилтэй, юу ч бодолгүй ярьдаг Насаагийн дүр танд таалагдах байх :)

Хэсэг 2
...Насаа охид руу харан
-За эхний өдрийн хичээл ямар байна? гэж асуухад хэн ч хариулсангүй. Тэд түүнээс гэрэвшээд байх шиг. Насаа ч бас олон охидын өмнө биеэ барин бяцхан ичингүйрч байгаа нь ил. Гэхдээ энэ ичингүйрэл нас хүйснийх биш харин өөртөө ахадсан, урьд нь огт хийж үзээгүй албан тушаалаас болсон хэрэг. Насаа
-Хэрэв ядраагүй бол хэдүүлээ жаахан ярилцвал яах вэ? Та нар юу гэж бодож байна? гэж царайчлангуй гуйхад Тунгаа
-Бид ярилцах гэж байгаа. Нэг аятайхан газар ороод гэлээ.
-Аятайхан газар гэдэг чинь юу билээ?
-Хүйтэн шар айраг ууж болох газар
-Аан, баар уу? Тэр ч надад зохихгүй ээ. Эндээ л гялс ярилцчихъя гээд сандал аван суухад гарахын түүс болж байсан охид дурамжхан буцаж сууцгаав.
-За ямар ч байсан бид хэд цаашид хамтрах юм байна. Өнөөдөр ирсэн та хэд хамтлаг болох хүсэлтэй ирцгээсэн биз дээ. Тэгэхээр хэдүүлээ шийдвэрлэх нэг зүйл байнаа гэж Насааг хэлэхэд Тунгаа
-Юу юм бэ? гэж хайнга асуухад нь түүн рүү учиртай хараад
-Нэр! гэвэл охидын нүд гэрэлтэн
-Нээрээ бид чинь хамтлагийнхаа нэрийг өгөөгүй юм байна ш дээ гэлцлээ. Насаа
-Нэрээ юу гэж өгөх вэ? Охидын хамтлаг болохоор цэцэг навчтай нэр өгөлтэй биш. Бас утга учиртай нэр өгнө шүү хэдүүлээ. За байз, та нар чинь тавуулаа. Уг нь 7 байсан бол Солонго гээд нэрлэчихгүй юу. Солонгийн 7 өнгийн хувцас өмсөөд л. Гэхдээ одоо хаанаас 2 охин хайж явах билээ дээ. Тэгээд ч хүн нэмбэл хүнс нэмнэ гэдэг. 7 хүний зардал дийлдэхгүй. За байз 5 гэдэг чинь таван тив гэсэн үг. Киви хамтлагийг дуурайгаад таван өөр үндэстнээр төлөөлүүлбэл яах бол. Тэр чинь юу билээ? Хар, цагаан, шар. Тэгээд юу билээ? Хар, цагаан, шар гээд дуусчих юм. Таван тивийг чинь таван өөр өнгөөр төлөөлдөг биш билүү?
-Улаан арьстан гэдэг билүү?
-Улаан гэнээ? Хаана байна тийм улаан арьстай хүмүүс?
-Индиануудыг чинь улаан арьстнууд гээд байдаг ш дээ
-За бас тийм. Тэгэхээр улаан, хар, цагаан, шар тэгээд үлдсэн өнгө нь ямар өнгө юм болоо? Ногоон арьстан гэж байдаг юм болов уу?
-Яалаа гэж дээ. Хэзээ тийм арьстан байсан юм бэ
-Үгүй энэ эхнэр хүүхнүүд л “муусайн ногоорсон архичид, ногоортлоо уугаад” гэж загнаад байдаг биз дээ. Тэгээд би харахаар ногоорсон юм харагдахгүй л юм билээ. Манай хэдэн найзууд байнаа. Ер нь бол лигийнхэн л дээ. Гэхдээ л тэгж хүн аймаар ногоорсон юм харагддаггүй ш дээ. Ямар харь гаригийнх биш дээ.
Охид инээлдэхэд Урнаа
-Та их хөгжилтэй юмаа гээд хөхрөв.
-За даа хөгжилтэй ч юу байхав. Ингэхэд би сайн муугаа эхэнд нь хэлчихье. Ах нь жаахан хадуурдаг гэмтэй шүү. Ямар сайндаа найзууд маань намайг “Хадуур” Насаа гэж нэрлэж байхав. За та нарт л гэж хэллээ шүү. Цааш нь битгий дамжуулаарай. Мэдэхгүй хүн сонсвол нөгөө юүдэнтэй малгайтай хар нөмрөг нөмөрсөн хадууртай амьтантай андуурах вий дээ. Тэгвэл нөгөө үхэл гуай чинь “Хөөе Насаа гуай аятайхан байгаарай, нэр зээлдээд халтуур хийгээд байна уу” гээд намайг аваад явчихна шүү дээ. Эсвэл дургүй хүргэсэн хүнээ хадуураар сийчээд хаячихдаг рецедив гэмт хэрэгтэн гэж бодож магадгүй шүү. За байз би юу ярьж байлаа? Ингээд хадуураад анх юу ярьж байснаа мартчихдаг юм
-Хамтлагийн нэрний талаар ярьж байсан ш дээ
-Аан тийм нэр. Нэг тийм сонсголонтой, хэнд ч хэлэхэд амархан нэр байвал зүгээр байхаа тээ? Энэ хамтлагийнхан сүүлийн үед гадаад нэр их өгдөг болж. Тэрийг нь тэгээд хэн ч ойлгохгүй. Манай нэг хамаатны 5 настай охин байдаг юм. Дуу хөгжимд дуртай гэж нөхцөлгүй. Би нэг өдөр тэр охиноос асуухгүй юу. Миний дүү ямар дуунд дуртай вэ гэж. Тэгсэн чинь Эмээгийн ном гэдэг хамтлагт дуртай гэнэ. Би гайхаад. “Энэ ямар сонин нэртэй хамтлаг вэ?” гэж бодоод л яваад байсан чинь Anemone хамтлаг байсан юм байна лээ ш дээ. За тэгээд Эхэстээсий (Extacy), Крааш бааш (Crash Bash), Хоониймүүн (Honeymoon) гээд юу гэж байгааг нь мэдэхгүй баахан хамтлаг. Гадаадын хамтлаг монголд ирээд тоглолт хийгээд байгаа юм уу, гадаад хамтлаг монголоор дуулаад байгаа юм уу мэдэхгүй ээ. Зайлуул тэр хөдөөнийхний толгой бүр эргэж гүйцдэг байхөө.
Энэ үед гаднаас Насаагийн найз зураач эр жаахан халамцуу орж ирснээ охидыг хараад гараа алдлан
-Хөөх энд чинь тэнгэрийн элч нар буугаад ирээ юу даа гэхэд Насаагийн нүд, чих сэртэсхийн
-Юу гэсэн бэ чи сая? гэж лавлалаа.
-Ямар сайхан охид цуглаа вэ л гэлээ
-Үгүй ээ чи арай л өөр юм хэлсэн дээ. Тэрийгээ дахиад хэл дээ
-Ганц шил юм хувааж ууя гэдгээ би хэлчихсэн үү?
-Үгүй, тэрнээс өөр нэг гоё үг хэлсэн дээ
-Чи чинь биднээс тусдаа эхэлчихсэн юм биш биз дээ. Алив наашаа үлээ дээ гэхэд Насаа охидоос санаа зовон хулмалзаж найзыгаа хажуу тийш аваачин намуухнаар
-За яалаа гэж дээ. Би ажилтай байхад чинь яалаа гэж уудаг юм бэ? Тэгээд ч одоо би архийг тэвчиж байгаа. Хөгшин чинь ахуй амьдрал, алс ирээдүйгээ бас бодмоор байна гэв.
-За ингээд л өвчин нь хөдлөөд хадуураад явчихдаг юм шүү. Мал мэнд үү гэсэн биш гай болов гэгч болох нь шив дээ
-Нээрээ тийм бололтой. Миний найз хөгшнийгөө ёстой уучлаарай. Хөгшин нь дараа л нэгдэе гэж ятгаад найзыгаа түлхэх шахам заалнаас гаргалаа. Тэгээд хаалгаа хаан охид руу харан
-Сая юу гэж хэлснийг та нар сонссон уу? гэж асуухад Урнаа
-Таныг архи ууя гэсэн гэв. Насаагийн чих улайгаад
-Хөөе би тэрнийг асуугаагүй байна. Та нарыг их гоёор хэлсэн дээ гэхэд Тунгаа
-Тэнгэрийн элч нар гэсэн гэлээ.
-Аая, ёстой догь нэр. Тэнгэрийн 5 элч, атаа 5 тэнгэр. Хөөе юу вэ? Атаа 5 тэнгэр гэдэг чинь юу гэсэн үг билээ? Бусдын атаархлыг төрүүлдэг гэсэн үг үү, эсвэл атаа хорслын атаа юм болов уу? За за тэр атаа 5 тэнгэр ч яахав. Тэнгэрийн 5 элч гэдэг нэр ямар байна? гэхэд энэ нэр охидын сэтгэлд нийцсэн тул толгой дохицгоолоо. Тунгаа
-Анлиар Angels гэвэл яах уу? гэхэд Насаа
-Үгүй тэгээд л англи хэл рүү орчих юм. Аялгуу сайхан монгол хэлээр аягүй гоё сонсогдож байхад заавал англи нэр болгох хэрэг байгаа юм уу? Зүгээр л “Тэнгэрийн 5 элч”. Тэнгэрлэг 5 тэнгэрийн элч нар. Ер нь тэнгэрлэг гэх хэрэггүй юм байна. Зүгээр л “Тэнгэрийн 5 элч” гэе, тэгэх үү? гэхэд охид зөвшөөрцгөөв.
-За тэгвэл нэрээ өгчихлөө. Одоо дараагийн асуудал. Ээмээжээ яаж бүрдүүлэх вэ?
-Ямар юмаа гэнээ?
-Яагаав ээмэдж
-Аан имеж үү?
-За тиймээ. Би тэр гадаад үгийг нь хэлж чадахгүй юм. Монголчилбол дүр төрх гэсэн үг юм шиг байгаа юм. Тэрнийгээ эхлээд бүрдүүлэх ёстой юм шиг байна гэхэд Тунгаа
-Бүгдээр нэг тийм гоё эмэгтэйлэг, секси имеж бүрдүүлбэл яах уу? гэхэд Насаа
-Секси гэнэ шүү. Одоо тэр чинь монголоор тачаангуй гэсэн үг биз дээ. Хөгшин би хүртэл та нартай энэ үгний талаар ам нээж чадахгүй ичсэндээ чих улайгаад байхад чинь. Хөөе та нар чинь хэдэн настай билээ дээ? гэлээ. Нандиа
-Харин тийм, Насаа ахын зөв шүү. Тэгээд ч секси хүүхнүүдийг цөөхөн тооны эрчүүд л сонирхдог болохоор массыг хамарч чадахгүй. Бидний зорилтот бүлэг бол бүх насны, бүх жендерийнхэн байвал зүгээр байхаа гэв. Насаа
-Яая, Манай Нандиа чинь сая ямар хэлээр ярьчихав аа. Зорилтот бүлэг, масс, жендер гээд л. Чи чинь эдийн засгийн анги төгссөн үү?
-Төгсөөгүй ээ. Эдийн засаг, менежментийн чиглэлээр сурч байгаад дундаас нь гарчихсан юм
-Харин тийм байхаа, хэлж ярьж байгаа нь цаанаа л өөр байсан юм. Чи хө менежмент, эдийн засгийн тал дээр ахдаа тусалж байгаарай
-За, гэхдээ би чадах болов уу даа?
-Чаднаа чадна. Хүн ер нь өөрийгөө голох хэрэггүй байдаг юм. Юу ч байсан би чадна, би дийлнэ гэж бодоод байвал зорьсондоо хүрдэг л байхгүй юу. Жишээ нь би сайхан дуулж чадахгүй. Гэхдээ цагаа тулбал найран дээр 3 дуу дуулчихна. Наадамд яаж ийж байгаад, ам мэх хийгээд ч болов нэг давчихна гэж боддог шүү. Сониноос манай чуулгынхан нэг зун хөдөө тоглолтоор явлаа. Тэгсэн чинь манай нэг дуучны хоолой нь өвдөөд дуулах нь байтугай олигтойхон ханиаж ч чадахгүй болдог юм байна. Чуулгын дарга намайг дуул гэнээ. Би чадахгүй гэсэн чинь цалин хөлстэй ярина энэ тэр гэхээр нь гараад дууллаа даа. Уг нь тэр золигийн дууг нь би мэддэг юм. Гэтэл олон хүний өмнө гарсан чинь сандраад, дууныхаа хоёрдугаар бадгийг таг мартаж нэгдүгээр бадгаа гурван удаа дуулаад арай гэж дуусгасан болсон шүү. Миний ичсэн гэж жигтэйхэн. Тэгсэн чинь хүмүүс алга ташаад сүйдээ. Ингэж л холиож байлаа шүү дээ. За би сургааль айлдаад хадуураад алга болох нь. Юу ярьж байлаа. Аан тийм. Тунгаа чи болиочээ. Чи угаасаа секси болохоор тэр зүг рүүгээ бусдыгаа чирээд байгаа байхгүй юу. Чи ер нь төрөлхийн ийм секси байхаа. Чамайг ямар ч хувцсаар далдалсан гэсэн уг чанар чинь харагдаад л байх байх даа. Чамд барилгачдын нөгөө хөвөнтэй дамбаал өмсүүлсэн ч гэсэн секси харагдах байх шүү. Аягүй бол турба бариулаад явуулбал хүмүүс чамайг стрептиз үзүүлж байна гэж бодох байх даа. За за ах нь тоглосон юм. Гомдоогүй биз дээ
-Заа яалаа гэж дээ
-Үгүй энэ ярьж байгаа нь хүртэл цаанаа л нэг урин дуудсан аястай шүү. Яалаа гэж дээ гэж байгааг нь
Урнаа
-Би л лав секси байж чадахгүй. Хэрэв би Тунгаа эгч шиг хувцас өмсөөд олон хүний өмнө гарах юм бол шууд нүүр шатна даа. Тэгээд ч нүцгэн байгаагаасааа ичээд аав, ээжийгээ ч тоглолтондоо авчирч чадахгүй. Харин бүгдээрээ хүүхдэрхүү байвал яахав?
Насаа
-Ээ та нар битгий ингэж өөрсдийнхөө давуу тал руу хөмрүүлэх гээд бай л даа. Урнаа чамайг хамтлагийн хамгийн бага настай нь гэдгийг ах нь ойлгож байна. Гэхдээ чи бод доо. Хүүхдэрхүү төрхтэй охид хүүхдийн л дуу дуулна тийм үү? Тоглолт хийсэн чинь баахан сургууль, цэцэрлэгийн жоохон бацаанууд. Танхимаар нэг шуугилдаан, уйлаан, орилоон. Тэгээд тоглолт дууссаны дараа би баахан малгай, бээлий, өрөөсөн гуталны асуудалд ороогдож эцэг эхэд нь ээрэгдээд бөөн юм болно ш дээ.
Сараа дурамжханаар
-Та тэгээд биднийг ямар байлгах гээд байгаа юм бэ? гэж өдсөн аятай асуухад Насаа хэсэг бодсоноо аятайхан шийдэл олоогүй тул хоолойгоо засан
-Би сайн мэдэхгүй байнаа. Та нар өөрсдөө сайн ярилцаад шийд л дээ. Ах нь та нарын продюсерын хувьд л зөвлөе. Хамтлагийн ахлагчийн хувьд Нараа юу гэж бодож байна гэхэд бүгд Нараа руу харцгаалаа. Нараа тулгамдан ичсэндээ доош харж
-Би сайн мэдэхгүй байнаа гэвэл Тунгаа ёжтой жуумалзан
-Манай хамтлагийн продюсер, ахлагч хоёрын хэлж байгаа үг нь хүртэл адилхан байдаг байна ш дээ. Нэр нь хүртэл Насаа Нараа. Та хоёр ах дүүс биш биз? гэхэд ичсэндээ Нараагийн хацар нь улайжээ. Насаа
-Хэрэв Нараатай хамаатан садан байсан бол би ийм царай муутай байхгүй ш дээ. За за тэр ч яахав. Ер нь бодоод байсан чинь бүгд заавал тэгж хиймэл баг зүүх хэрэг байна уу? Хүн бүр өөр өөрийн гэсэн зан ааштай. Түүнийгээ л илэрхийлбэл болоо биш үү. Жишээлбэл Тунгаа секси байхад, харин Урнаа хүүхдэрхүү стильтэй байх жишээтэй.
Нандиа
-Би тэгвэл ямар байх уу?
-Чи өөрөө юу гэж бодож байна?
-Би спортод дуртай л даа
-Воо харж байна уу? спортлог. Хувцас хунар нь хүртэл спортын жишээтэй. Харин Нараа чи яамаар байна?
-Би ч энгийн л байх дуртай
-Энгийн энгийн. За байз энгийн гэдэг чинь чөлөөтэй гэсэн үг. Хөөе чи хип хоп стилийнх болох юм уу? Өргөн өмд, саравчтай малгай өмсөөд л
Тунгаа
-Насаа ахаа хип хопчид чинь өргөн өмд өмсөхөө больчихсон ш дээ
-Хэзээнээс тэр вэ?
-Удаж байнаа
-За ингээд л би хоцроод байгаа юм. Уг нь цаг үетэйгээ хөл нийлүүлье гэж бодоод л байгаа хэр нь даан ч хөл гүйцэхгүй, чих, нүдний хараа хүртэл гүйцэхгүй юм. Зурагтаар шинэ залуу хамтлагийнхны тухай үзэх гэхээр нэг мэдэхэд унтчихсан байна. Эсвэл чих дүнгэнээд, нүдний хараа тэр клипнийх нь хурдыг гүйцэхгүй ядарчих юм. Клип гэснээс одоо чинь клип хийх гэж бүр алаад өгдөг болжээ. Юу болоод, юу гараад, юу өрнөөд байгааг нь харж гүйцэхээргүй юм гээч. Бидний үед чинь нэг их сайхан богино хэмжээний кино үзчихсэн юм шиг болдог байлаа ш дээ. За хадуурах нь, тэгэхээр Нараа чөлөөт стильтэй болох шив гэхэд Нараа духаа маажин инээмсэглэж толгой дохилоо. Насаа Сараа руу харан
-За одоо чиний ээлж гэхэд Сараа бохь зажлан хэнэггүй сууна.
-Чамд ямар дүр таарах юм бол доо. Чи өөрөө юу гэж бодож байна?
-Юу ч байсан хамаа алгаа
-Юу ч байсан болно гэдэг чинь юу гэсэн үг вэ? Чамайг лам стильтэй бол гэвэл яах уу? Шар дээл өмсгөж, улаан орхимж хийсгээд л. Үсээ хусуулчихсан, хүзүүндээ том эрхи зүүчихсэн тайзан дээр гарч ирвэл яах бол
-Хамаа алгаа
-Тийм баларсан юм гэж юу байдаг юм. Аан би оллоо. Чамайг ингээд хараад байхад их албаны маягийн нэг тийм төрх харагдаад байна. Чамайг ажил хэрэгч бүсгүй болговол яах уу?
-Болж л байна.
Сараа эхнээсээ л хайхрамжгүй, үл тоосон байдалтай байсан агаад Насаа түүнээс элдэв юм асууж эвгүй байдалд орох вий гэж санаа зовж цааш олон юм ярихаас зүрхшээн бусад руу нь хараад
-За тэгвэл охидоо ингэж тохиролцох шив? гэхэд Урнаа хушуугаа унжуулан
-Би тэгээд хэдий болтол хүүхэд шиг байх юм бэ? Би одоо насаар бага ч гэсэн удахгүй жинхэнэ эмэгтэй хүн болно ш дээ гэхэд бусад нь жуумалзан инээмсэглэж, Сараа доогтой инээд алдав. Насаа
-Хэн чамайг эрэгтэй гэсэн юм бэ? Хүүхдэрхүү төрхнөөс чи яагаад дургүйцээд байгаа юм бэ? Тэр чинь хөөрхөн, эгдүүтэй ш дээ. Хөгшин, залуу хүн бүрийн хайрыг булаасан. Хувцас хунар нь ч гэсэн эрээн мяраан нэг тийм эгдүүтэй. Ээнимооний охидыг чи санаж байгаа биз дээ. Чг тийм гэсэн үг гэхэд Урнаа хэсэг бологоширсноо инээмсэглэн
-Өнгө өнгийн хувцас өмсөөд л үү? Тэгвэл надад таалагдаж байна гэлээ.
-За ингээд имежийн хувьд тохирлоо. Ёох ямар хэцүү юм бэ? Эмэгтэй хүн ийм олон янз байдаг гэж би бараг төсөөлж ч байсангүй. Би эмэгтэй хүнийг дуугаар л баримжаалаад 2 төрөлд хуваагаад байдаг юм ш дээ. Нэгд нь нөхөрдөө үнэнч бүсгүй, хоёрдох нь нууц амрагтай эмэгтэй. Ингээд л болоо
-Арай ч дээ
-Дуунд угаасаа энэ хоёр төрлийн эмэгтэйг л дуулдаг ш дээ. Царай зүс бол ердөө л нэг. Хорвоогийн бүх хүүхнүүд хөөрхөн. Тэгээд л болоо. Энэ нь ч амар юмуу дөө.

#349